子楹BB

我真係要努力放子楹d相上黎喇，而家都兩歲八個月喇，但係就一張相都未放過上黎，而家要迫自己每星期至少放五張相，哈哈~~

呢幾張相係子楹十幾日大到滿月時，在醫院裡影的，因為早產既關係，所以都住左成十個星期醫院。d相隔住個玻璃黎影，所以都唔係咁清。

出世既時候得兩磅幾重量，真係好細粒，但係都算得意啦，不過，初生BB真係好醜樣囉~~~

係咪奇怪點解唔放子楹剛出世到十幾日大既相呢？因為當時仲要戴氧氣罩，好多儀器既線，感覺唔係幾好，所以都係揀d比較好既放上黎好d，呵呵~~~~

開學喇

今日子楹第一日正式返預備班，心情十分好，由昨晚開始就好期待今日返學，今朝叫佢起身一話返學，竟然唔賴床就即刻起身，仲要自己揹書包，之後同我拜拜話要自己返學，又話d小朋友都係自己返學，哈哈~~

到夜晚見到佢，佢又扭計要做功課，同佢講冇功課做就喊，係都話要做功課，比本簿佢話係功課佢又話唔係，一定要學校既功課，但問題係，呢間學校係唔主張咁多功課做，最緊要小朋友學得識就得，唔係下下都要抄抄寫寫，但係子楹見到表哥仔日日都做功課，就覺得每日都要做功課，真係未見過小朋友咁鐘意做功課.....=.=